Policia e Kosovës ka arrestuar një 31-vjeçar me inicialet N.A., i dyshuar për kryerjen e disa vjedhjeve brenda një nate në qytetin e Ferizajt, si edhe për përfshirjen në dy raste të mëhershme.
Sipas njoftimit të policisë, rastet e fundit u raportuan më 4 dhjetor 2025. Rreth orës 20:04, në rrugën “Zenel Hajdini”, i dyshuari kishte vjedhur artikuj ushqimorë nga një market. Vetëm një orë më vonë, rreth orës 21:00, në rrugën “Lulzim Guta”, ai dyshohet se ka marrë disa palë këpucë nga oborri i një shtëpie.
Policia arriti ta identifikojë dhe ta arrestojë atë rreth orës 21:20. Gjatë intervistimit, N.A. pranoi se kishte kryer të dy vjedhjet e asaj nate.
Pas analizimit të provave dhe video-incizimeve, hetuesit e lidhën atë edhe me dy raste të tjera të vjedhjeve të ndodhura më herët:
- 15.10.2025, në rrugën “Esat Mekuli”, ku ishin vjedhur disa palë këpucë;
- 31.10.2025, në rrugën “Dëshmorët e Kombit”, brenda Xhamisë së Madhe të Ferizajt, ku ishin vjedhur pajisje zëri dhe këpucë.
I dyshuari ka pranuar edhe këto dy raste.
Me vendim të prokurorit, N.A. është liruar në procedurë të rregullt, ndërsa hetimet lidhur me këto raste po vazhdojnë.
Policia Rajonale e Ferizajt ka theksuar se mbetet e përkushtuar në parandalimin dhe zbardhjen e veprave penale, si dhe në garantimin e sigurisë së qytetarëve.
