Tre persona të dyshuar për përfshirje në veprimtari kriminale janë arrestuar të mërkurën gjatë një operacioni policor në Prishtinë.
Sipas Policisë, pas veprimeve operative dhe informatave të siguruara nga Njësia e Inteligjencës e Stacionit Policor Qendra në Prishtinë, janë identifikuar dhe arrestuar dy persona të dyshuar për kryerjen e veprës penale “Vjedhje”, si dhe një person tjetër i dyshuar për veprën penale “Blerja, pranimi ose fshehja e sendeve të përfituara nga kryerja e veprës penale”.
“Të arrestuarit janë: A.H. (mashkull, 44 vjeç), E.I. (mashkull, 32 vjeç), dhe A.Z. (mashkull, 25 vjeç)”, bëhet e ditur në njoftim.
Puna hetimore ka vazhduar nga Sektori i Hetimeve të Kryeqytetit, të cilët kanë mbledhur dëshmira për rreth 10 raste, ku dyshohet se personat e dyshuar janë të përfshirë.
Po ashtu, janë gjetur dhe sekuestruar disa sende të dyshuara si të përfituara nga këto vepra penale, të cilat, pas përfundimit të procedurave, do t’u rikthehen pronarëve.
Në koordinim me Prokurorin e Shtetit, të dyshuarit janë dërguar në mbajtje për 48 orë./teve1.info/
