Policia e Kosovës ka njoftuar se të hënën në koordinim me Prokurorin Speciale pas një aktiviteti të gjatë hetimor, ka arrestuar tre dyshuar të cilët dyshohen se kanë kryer krime lufte kundër popullatës civile gjatë luftës në Kosovë.
Sipas njoftimit fillimisht në qytetin e Lipjanit në dy lokacione të ndara janë lokalizuar dhe arrestuar i dyshuari B.T. dhe e dyshuara N.Ç.
Ndërsa, në vazhdimësi të aktivitetit operativ në Prishtinë është lokalizuar dhe arrestuar edhe i dyshuari i tretë M.I.
Të njëjtit thuhet se dyshohen që kanë kryer krime lufte kundër popullatës civile gjatë vitit 1998-1999 në Burgun e Prishtinës dhe Lipjanit, ku në cilësi të gardianëve-zyrtarëve korrektues kanë marrë pjesë në maltretimin, rrahjen, torturimin fizik dhe psikik te të ndaluarve shqiptarë.
“Të arrestuarit janë shoqëruar ne zyrat e Drejtorisë së Hetimit të Krime të Luftës dhe janë duke u intervistuar. Policia e Kosovës është e përkushtuar të vazhdojë me hetimet dhe bashkëpunimin e ngushtë me autoritetet përkatëse për të siguruar drejtësi lidhur me krimet e luftës në Kosovë”, thuhet në komunikatë./teve1.info/
