Policia e Kosovës ka arrestuar tre persona të cilët ishin në kërkim si të dyshuar për vrasje në tentativë. Rasti, sipas Policisë, kishte ndodhur më 13 shtator lagjen “Arbëria” në Prishtinë.
Personat e arrestuar janë J.B, H.A, A.K – të gjithë shtetas të Kosovës.
Njësiti i hetimeve të përgjithshme, përveç arrestimeve, ka sekuestruar edhe dy armë zjarri.
“Personat e dyshuar kanë qenë në kërkim nga ana e policisë, për një rast vrasje ne tentativë, shkaktim i rrezikut te përgjithshëm, që ka ndodhur me datën 13.09.2025, në lagjen Arbëria në Prishtinë”, tha Policia në raportin 24-orësh.
Të dyshuarit, me vendim të prokurorit janë dërguar në qendrën e mbajtjes.
“Ndaj tyre janë iniciuar procedurat për veprat: Shkaktim i rrezikut të përgjithshëm dhe armëmbajtje pa leje, ndërkohë që për veprën Vrasje në tentativë policia është në kërkim të dy personave të dyshuar të cilët tashmë janë identifikuar”, bëri të ditur Policia e Kosovës të premten, më 19 shtator.
