Një punëtor ka humbur jetën në vendin e punës në Prizren. Për rastin janë arrestuar tre menaxherë të kompanisë, ndërkaq rasti po vazhdon të hetohet nga njësiti i hetimeve.
E diela doli të jetë tragjike për 25 vjeçarin A.G nga fshati Vragoli e Fushë Kosovës.
Policia e Kosovës bëri të ditur se i riu vdiq si pasojë e lëndimeve të marra në vendin e tij të punës.
Vdekja e tij erdhi si pasojë e goditjes në kokë nga një profil metali, i cili ra nga kjo ndërtesë e cila ishte duke u rinovuar.
Vdekjen e viktimës e konstatoi edhe mjeku kujdestar.
Ndërsa në lidhje me rastin, u arrestuan tre të dyshuar.
“Në vendngjarje kanë dalë njësitë përkatëse policore, prokurori si dhe inspektori i punës.
Në lidhje me rastin janë arrestuar tre të dyshuar meshkuj kosovar (menaxherë) të cilët pas intervistimit me vendim të prokurorit janë dërguar në mbajtje për 48 orë, thuhet nga Policia e Kosovës.
E varrimi i të ndjerit u bë të hënën. Ndërsa familja hapi dyert për të pame.
Rasti është iniciuar “Asgjësim, dëmtim ose heqje e pajisjeve mbrojtëse dhe rrezikim i sigurisë në vendin e punës” , i cili vazhdon të hetohet nga hetues policor nga njësiti i hetimeve.
Vdekjet në vendet e punës vitet e fundit janë shpeshtuar në Kosovë.
