Policia e Kosovës ka njoftuar se ka arrestuar dy persona të dyshuar për kryerjen e veprave penale “pranimi i ryshfetit në sektorin privat’’ dhe “falsifikimi i dokumenteve’’.
Sipas njoftimit, të dyshuarit H.S dhe E.S. si pronar/e dhe përgjegjës në një autoshkollë në Kaçanik dhe degën e saj në Han të Elezit, me qëllim të përfitimit pasuror për vete apo personin tjetër, dyshohet se; kanë pranuar ryshfet në shuma të ndryshme parash nga kandidatë të ndryshëm, për t’ia mundësuar marrjen e patentë shoferit për kategorinë “B” dhe kategorinë ,,C’’, pa iu nënshtruar testeve/kritereve përkatëse, përfshirë edhe sigurimin e certifikatës mjekësore, pa i ’u nënshtruar kontrolleve të rregullta mjekësore si dhe plotësimin e vërtetimit që kandidati kinse është aftësuar në pjesën teorike dhe praktike.
Po ashtu bëhet e ditur se gjatë kontrollimit të autoshkollës janë gjetur dhe sekuestruar dy telefona mobil, pesë regjistratorë, shtatë fletore regjistrimi, 64 dosje origjinale të kandidatëve dhe 21 certifikata mjekësore të shoferëve profesionalë për punë.
Të dyshuarit me aktvendim të prokurorit, janë ndaluar për 48 orë për procedurë të mëtejme ligjore, ndërsa rasti është duke u hetuar./teve1.info/
