Dy persona janëarrestuar dhe ndaluar për 48 orë për rastin në Gjakovë ku humbën jetën dy punëtorë pas lëndimeve të marra në vendin e punën.
Lajmin për teve1.info e ka konfirmuar zëdhënësi i Policisë për rajonin e Gjakovës, Shermet Elezaj.
“Dy persona janë intervistuar në cilësinë e të dyshuarve dhe me urdhër te prokurorit janë dërguar në mbajtje për 48h”, ka thënë ai.
Mëngjesin e së hënës dy punëtorë nuk u kanë rezistuar plagëve të marra në vendin e punës.
Për rastin është deklaruar edhe Prokuroria Themelore në Gjakovë.
Në komunikatë është bërë e ditur se trupat e pa jetë janë dërguar në Institutin e Mjekësisë Ligjore për obduksion.
Poashtu nga kjo prokurori është thënë se brenda afatit ligjor do të paraqitet kërkesa për paraburgim ndaj dy të ndaluarve.
“Po ashtu, me vendim të Prokurorit të Shtetit, janë ndaluar dy (2) persona, në kohëzgjatje prej 48 orësh lidhur me këtë rast, për shkak të veprës penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”. Brenda afatit të paraparë ligjor, ndaj të njëjtëve do të paraqitet kërkesa për caktimin e masës së paraburgimit”, thuhet në komunikatë.
Dy persona vdesin në Gjakovë, dyshohet se pësuan lëndime në vendin e punës
