Policia e Kosovës, të premten, ka përfunduar me sukses një operacion gjithëpërfshirës në nëntë lokacione të ndara, i cili ka rezultuar me arrestimin e disa personave si dhe zbulimin dhe sekuestrimin e armëve dhe municioneve.
Sipas njoftimit, operacioni ka rrjedhur pas një hetimi gjithëpërfshirës mbi informacione të mbledhura nga burime të ndryshme, përfshirë edhe ekspozime të armëve nga persona të caktuar në rrjete sociale.
“Janë kryer nëntë bastisje si dhe janë sekuestruar një armë e gjatë, një pushkë gjuetie, dy revole, si dhe një sasi e konsiderueshme municioni”, thuhet në njoftim.
Po ashtu, bëhet e ditur, se me rekomandimin e prokurorit të shtetit, policia ka iniciuar një hetim në drejtim të veprave penale “Mbajtja në pronësi kontroll ose posedim apo shfrytëzim të pa autorizuar të armës”, si dhe “Mbajtja në pronësi kontroll ose posedim të pa autorizuar të armës.
Ndërkaq, të dyshuarit lidhur me këtë rast janë proceduar më tej.
“Ky operacion pasqyron përkushtimin dhe përpjekjet tona të vazhdueshme kundrejt armëve të zjarrit pa leje, për të garantuar sigurinë publike, për respektimin e ligjit dhe mbrojtjen e të drejtave të të gjithë qytetarëve. Në të njëjtën kohë i bëjmë thirrje publikut të raportojë çdo aktivitet të dyshimtë për të na ndihmuar në misionin tonë për të ruajtur paqen dhe sigurinë”, theksohet në njoftim.
