Janë arrestuar dhjetë persona në Prishtinë dhe Pejë nën dyshimin e kryerjes së veprave penale “krim i organizuar” dhe “organizimi i skemave piramidale dhe bixhozit të paligjshëm”, raporton teve1.info
Sipas komunikatës së Policisë, arrestimi i tyre është bërë me autorizim të Prokurorisë Speciale derisa në arrati janë edhe gjashtë perona tjerë të dyshuar për këto vepra.
Sipas Policisë, në cilësi të provave materiale janë sekuestruar 4 mijë e 423 euro, dy aparate të lojërave të fatit, 25 telefona mobilë,dokumente dhe gjësende tjera.
Me urdhër të prokurorit dhjetë rë arrestuarit janë dërguar në mbajtje për 48 orë.
“Ky operacion policor është zhvilluar pas hetimeve disa mujore, ku personat e dyshuar në bashkëveprim me njëri-tjetrin dyshohet se kanë kryer veprat penale të lartcekura për një periudhë të gjatë kohore.
Gjatë operacionit janë kontrolluar dymbëdhjetë (12) lokacione (vendbanime dhe lokale), janë ndaluar dhjetë (10) persona me aktvendim mbi ndalimin si dhe janë intervistuar edhe pesëmbëdhjetë (15) persona të tjerë në cilësinë e të dyshuarve të cilët lirohen në procedurë të rregullt, të njëjtit janë hasur duke mundësuar zhvillimin e lojërave të bixhozit online.
Gjatë kontrollit edhe gjashtë (6) të dyshuar tjerë nuk janë hasur në lokacionet e tyre, andaj të njëjtit mbeten në kërkim policor”, thuhet ndër të tjera në komunikatë.
