Policia e Kosovës ka bërë të ditur se ka arrestuar personin e kërkuar për vrasjen që kishte ndodhur më 6 shtator 2025 në fshatin Llapashticë e Epërme të Podujevës. Arrestimi është kryer të enjten nga Drejtoria e Policisë së Kryeqytetit, konkretisht nga zyrtarët e Stacionit Policor Veriu në Prishtinë.
Në njoftimin zyrtar, Policia ka bërë të ditur se operacioni policor ka rezultuar me kapjen e të dyshuarit A.H. (31 vjeç), shtetas i Republikës së Kosovës, i cili ishte shpallur në kërkim për përfshirje në rastin e vrasjes së rëndë.
“Njësitet policore kanë ndërmarrë një operacion në Prishtinë, i cili ka rezultuar me arrestimin e personit të dyshuar, A.H., mashkull, 31 vjeç, shtetas i Republikës së Kosovës, i cili ishte i shpallur në kërkim nën dyshimin e bazuar për përfshirje në veprën në fjalë. Veprimet e mëtejme lidhur me personin e dyshuar do të merren në koordinim me Prokurorin e Shtetit”, thuhet në njoftimin e Policisë së Kosovës.
Sipas raportit 24-orësh të Policisë, gjatë arrestimit të të dyshuarit janë gjetur dhe konfiskuar një armë zjarri dhe një thikë, që dyshohet të jenë përdorur apo mbajtur në kundërshtim me ligjin.
“VRASJE E RËNDË
Podujevë 06.09.2025 – 19:36. Lidhur me rastin, më 23.10.2025 është arrestuar i dyshuari mashkull kosovar tek i cili gjatë kontrollit janë gjetur dhe konfiskuar një armë zjarri dhe një thikë. Me vendim të prokurorit, i njëjti pas intervistimit dërgohet në mbajtje”, thuhet në raportin policor.
