Autore: Adea Mustafaj
Ishte nisur të bënte rrugën nga Kosova për në Bosnje.
Mirëpo, gjatë kalimit në territorin serb, ish-pjesëtar i Ushtrisë Çlirimtare të Kosovës, Avni Qenaj, u arrestua nga autoritetet serbe.
Qenës dyshohet se policia kufitare ia gjeti një kartelë të veteranit të UÇK-së, çka alarmoi autoritetet në Serbi.
Kryetari i OVL-UÇK-së, Hysni Gucati, tregon se Avni Qenaj nuk e kishte për herë të parë kalimin nëpër Serbi.
“Me keqardhje e kom marr lajmin shumë. Avnia është nga Hasi. Një fshat i Hasit. Unë e kam pyetur kryetarin e degës së Hasit, Xhevdet Thaqi dhe Xhevdet Thaqi më thotë: Po Avnia ka qenë pjestar i Ushtrisë Çlirimtare të Kosovës, ka qenë në brigaden 138. Me sa kom informacione ka qenë në logjistik. Me sa kom informacione që kom marr informacione sot edhe dje prom shumë vonë, ka qenë në logjistikë Avnia… Ai po punojke në Bosnje me sa kom informacion. E kish furren në Bosnje dhe ai punëtor krahu ka shku me punu për idaren e familjes”, tha Gucati.
E për të gjithë veteramët e luftës Gucati ka vetëm një kërkesë.
“Gabimi është i joni. Duhet të jemi shumë real. Ne kemi bo apel para disa muajve edhe më herët: Ju lutem veteranëve dhe të gjithë atyre pjestarëve të Ushtrisë Çlirimtare të Kosovës, edhe fëmijëve të dëshmorëve, invalitëve, por edhe ne si veteran mos të përdorin lokacionin Serbi për Evrop apo dikun tjetër. Kur kemi alternativa tjera të shfrytëzojm Shqipërin, Malin e Zi dhe të udhëtojnë tjetër kah. Kështu që apeli jonë me sa duket ka ra në vesh të shurdhër të veteranëve dhe mua më vjen shumë keq”, u shpreh ai.
Zyra Ndërlidhëse e Kosovës në Serbi, sipas ministrisë së punëve të Jashtme, ka ndërmarrë veprimet e para.
“I kemi adresuar Zyrës Ndërlidhëse të Serbisë në Kosovë kërkesë zyrtare për konfirmimin e arrestimit, arsyet konkrete të ndalimit, vendndodhjen aktuale ku ai po mbahet, si dhe çdo informacion tjetër të domosdoshëm për trajtimin e mëtejmë të rastit. Paralelisht, Zyra Ndërlidhëse e Republikës së Kosovës në Serbi e ka njoftuar për rastin edhe Delegacionin e Bashkimit Evropian në Serbi, duke kërkuar monitorim të shtuar dhe transparencë të plotë nga autoritetet serbe në lidhje me procedurat e ndërmarra”, ka njoftuar MPJD.
Gjithashtu MPJD, njoftoi se është dërguar notë verbale te misionet diplomatike të vendeve të Quint-it të akredituara në Serbi.
Televizioni ka provuar që të marrë edhe një qëndrim nga familja e të arrestuarit Avni Qenaj, mirëpo për shkak të ndjeshmërisë së rastit, nuk kanë pranuar të flasin.
Ditën e djeshme, Presidentja Vjosa Osmani priti në takim ish-policin e Njësive Speciale të Kosovës, Arbnor Spahiu, i cili gjithashtu u mbajt në paraburgim për disa muaj nga Serbia.
