Autori: Adea Mustafaj
Gjatë ditës së diel, në Vushtrri, u zhvillua një aksion nga Prokuroria Themelore në Mitrovicë, në bashkëpunim me Policinë e Kosovës, nga i cili u arrestuan katër anëtar të familjes Gërbeshi.
Tre prej tyre të dyshuar për veprën penale “detyrimi”, ndërsa një tjetër kishte qenë në arrati për veprat “lëndim i lehtë trupor” dhe “arratisje”.
Pos arrestimit u sekuestruar dy armë të shkurta, 352 copë fishekë të kalibrave të ndryshëm, dy karikatorë, dhe një sërë gjësendes të tjera.
Për të akuzuarit, Prokuroria Themelore e Mitrovicës ka kërkuar nga gjykata që të caktohet paraburgimi.
Seanca është mbajtur gjatë pasdites së sotme.
“Të katër të pandehurit janë arrestuar ditën e djeshme, datë 21 shtator me ç`rast janë kontrolluar lokacione në fshatin Ropicë të Vushtrrisë dhe në qytetin e Vushtrrisë”, thuhet në reagimin e Prokurorisë Themelore në Mitrovicë.
Aksioni i organeve të rendit vjen pak javë pasi një qytetar nga Vushtrria denoncoi publikisht anëtarë të familjes Gërbeshi, për sulm ndaj tij.
Liridon Osmani deklaroi se është në hall nga kjo familje, për shkak të një kontesti pronësor.
Madje, shtëpia e tij ishte sulmuar me armë automatike, veprim për të cilin Osmani e akuzoi familjen Gërbeshi.
