Kryeinspektori Inspektoriatit të Punës, Hekuran Nikçi, do t’i kaloj 30 ditët e ardhshme në arrest shtëpiak.
Gjykata Themelore e Prishtinës ia ka vendosur atij këtë masë, pasi Nikçi, fillimisht u ndalua për 48 orë të enjten, me urdhër të Prokurorisë Themelore të Prishtinës.
Nikçi po dyshohet se ka kryer veprat penale “keqpërdorim i pozitës apo autoritetit zyrtar”, “cenim i të drejtave nga marrëdhënia e punës” dhe “përdorim i paautorizuar i pasurisë”.
Masë e njëjtë i është caktuar edhe ushtruesit të detyrës së menaxherit n njësinë për Menxhimin e Burimeve Njerëzore, Naim Shalaku.
Me këtë vendim të Gjykatës, nuk po pajtohet avokati i Nikçit, Arianit Koci.
“Paramendoni në kërkesën e Prokurorisë përmendet se në njërin prej vendimeve nuk paska qenë edhe Këshilla juridike pra nuk është përcaktuar se i dëmtuari sic e cilëson Prokuroria, ka pasë të drejtë, këso lëshime ndodhin në qindra në Kosovë, mbi të gjitha për këtë nuk është fare kryeinspektori i përgjithshëm” , u shpreh avokati Arianit Koci.
Koci ka hedhur kritika edhe ndaj kërkesës së Prokurorisë për caktimin e masës së paraburgimit.
“Të gjitha pretendimet e Prokurorisë kanë të bëjnë me lëvizjen e vendeve të punës mes tjerash të dy-tre personave që konsiderohen që janë të dëmtuar pra me lëvizjen që kanë bërë prej një vendi në vendin tjetër në kuadër të Inspektoratit të Punës, ka edhe disa elemente tjera që në këtë fazë nuk dua ta ngarkojë publikun. Sidoqoftë nuk ka asgjë, është bërë shumë zhurmë për asgjë”, tha Koci.
Koci ka bërë të ditur se do të ankohet ndaj vendimit të sotëm.
E para dy ditësh, Nikçi u intervistua nga Sektori për Hetime Financiare i Policisë së Kosovës.
Pas arrestimit, atij i doli në mbrojtje ministri i Financave Hekuran Murati, i cili shkroi në Facebook se nën udhëheqjen e Nikçit, Inspektoriati i Punës ka avencuar në shumë drejtime, dhe kërkesën e Prokurorisë për paraburgim, e konsideroi arbitraritet.
