Gjykata Themelore në Ferizaj i ka caktuar masën e arrestit shtëpiak nga masa e paraburgimit për ish pjesëtarin e FSK-së, Azem Kurtaj, i cili i kishte plagosur dy serbë në Shtërpcë në janar të këtij viti, raporton teve1.info
Zëdhënësja e Gjykatës Themelore në Ferizaj, Gentiana Hoxha, e ka konfirmuar vendimin e gjykatës për teve1.info, derisa tha se ky vendim është marrë pas mbajtjes së seancës fillestare.
“Ju njoftoj se pas mbajtjes së seancës fillestare të mbajtur me datë 16.03.2023, sipas informacioneve të marra nga gjyqtari i çështjes, ju konfirmojmë se të pandehurit A.K., i është zëvendësuar masa e paraburgimit me masën e arrestit shtëpiak, në kohëzgjatje prej dy (2) muaj”, ka thënë Hoxha për teve1.info.
Kurtaj ishte deklaruar i pafajshëm në seancën gjyqësore që po mbahet për rastin e plagosjes së dy të rinjve në Shtërpcë.
Dy të rinjtë serbë ishin plagosur derisa ishin duke bartur një pemë të Krishtlindjes në Shtërpcë.
Mbrojtja e Kurtajt, kishte insistuar se caktimi i paraburgimit për të u bë nën presion dhe se rastit iu dha karakter ndëretnik pa kurrfarë nevoje.
