Një i dyshuar për lëndim të rëndë trupor dhe armëmbajtje pa leje, është arratisur nga Pallati i Drejtësisë, pasi i është caktuar masa e paraburgimit në seancë dëgjimore.
Rastin e ka konfirmuar për teve1.info zëdhënëse e Gjykatës Themelore në Prishtinë, Mirlinda Gashi.
“Pas mbajtjes së seancës dëgjimore, gjyqtari i procedurës paraprake ka aprovuar si të bazuar kërkesën e Prokurorisë Themelore në Prishtinë, për caktimin e masës së paraburgimit ndaj të pandehurit L.H. dhe të njëjtit iu është caktuar masa e paraburgimit në kohëzgjatje prej një muaji. Gjykata vlerësoi se janë plotësuar kushtet për caktimin e paraburgimit, sepse nëse i pandehuri L.H. lihet në liri, i njëjti mund të jetë i paarritshëm për të zhvilluar procedurën penale”.
“Gjykata Themelore në Prishtinë lidhur me çështjen penale ndaj të pandehurit L.H., ka marr informacion se i njëjti pasi që ka pranuar aktvendimin për caktim të paraburgimit, ka arritur që t’i ik Policisë së Kosovës, të cilët kanë qenë kompetent për ta siguruar rastin”.
Redaksia ka kontaktuar edhe me Policinë e Kosovës dhe është në pritje të një përgjigje edhe nga ta.
