Të paktën tetë palestinezë janë vrarë në sulmet izraelite në qytetin e Jeninit në Bregun Perëndimor të pushtuar, tha Ministria e Shëndetësisë palestineze.
Ushtria izraelite tha më herët të martën se ushtarët, policia dhe shërbimet e inteligjencës filluan një “aksion kundër terrorizmit”, por nuk dha detaje të mëtejshme.
Identiteti i të vrarëve nuk është bërë menjëherë i qartë. Ministria e Shëndetësisë tha se më shumë se 35 persona janë lënduar.
Një zëdhënës i forcave të sigurisë të Autoritetit Palestinez (PA) tha në një deklaratë se forcat izraelite “hapën zjarr ndaj civilëve dhe forcave të sigurisë, duke rezultuar në lëndime të disa civilëve dhe një numri të personelit të sigurisë, njëri prej të cilëve është në gjendje kritike”.
Kryeministri izraelit Benjamin Netanyahu tha se operacioni kishte për qëllim “çrrënjosjen e terrorizmit”. Një zëdhënës i ushtrisë izraelite tha se operacioni në vazhdim u quajt “Muri i Hekurt”, raporton Al Jazeera.
Guvernatori i Jeninit, Kamal Abu al-Rub e quajti veprimin “një pushtim”, sipas agjencisë së lajmeve AFP.
“Ajo erdhi shpejt,” tha ai. “Aeroplanë Apache në qiell dhe automjete ushtarake izraelite kudo.”
