Zëdhënësi i Lëvizjes Vetëvendosje, Arlind Manxhuka, ka reaguar përmes një postimi në Facebook pas deklaratës së Ambasadës Gjermane në Kosovë, e cila shprehu shqetësim për, siç u tha, manipulimin e imazheve lidhur me operacionin humanitar të FSK-së në veri të vendit.
Në reagimin e tij, Manxhuka mohoi kategorikisht që VV të ketë manipuluar ndonjë fotografi, duke theksuar se imazhi i përdorur në postimin zyrtar të Lëvizjes është marrë nga burime publike dhe të verifikueshme.
“E nderuar Ambasadë e Gjermanisë në Kosovë,
Në postimin e nxjerrë nga Lëvizja VETËVENDOSJE! me një fotografi/graf nuk ka asnjë manipulim. Fotografia e përdorur nga ne është marrë nga postimi i Ministrit të Mbrojtjes që është marrë nga mediumi Kallxo.Com,” ka shkruar Manxhuka.
Ai shton se në kohën e lajmeve të rreme, është e rëndësishme që reagimet të jenë të bazuara në fakte dhe jo në keqinformim.
“Është shumë me rëndësi që në epokën e lajmeve të rreme reagimet të jenë të bazuara në fakte dhe të vërtetën dhe jo të shtresëzohen mbi lajme të rreme,” shkruan ai, duke e cilësuar lajmin për manipulim si një “fake news” që, sipas tij, ka çuar në lajthitje edhe vetë Ambasadën Gjermane.
Reagimi i Manxhukës vjen pas deklaratës së Ambasadës Gjermane që ngriti shqetësim për “heqjen e elementeve të dukshme të eskortës së KFOR-it në fotografi”, duke lënë të kuptohet se kjo mund të jetë bërë për të krijuar një narrativë të rreme rreth operacionit të FSK-së në veri.
Në këtë përballje deklaratash, LVV kërkon korrigjim të perceptimit publik dhe rikthim të debatit në baza faktike, ndërsa mbetet për t’u parë nëse Ambasada Gjermane do të reagojë më tej lidhur me këtë sqarim.
