Një banor i fshatit Bllacë të Suharekës ka raportuar në Policinë e Kosovës se në pronën e tij kanë hyrë tre arinj, të cilët kanë dëmtuar rreth 35 kosherë bletësh.
Sipas deklaratës së qytetarit, arinjtë kanë shkaktuar dëme edhe në një varrezë të fshatit disa ditë më parë.
Ai ka shprehur shqetësimin se prania e arinjve mund të paraqesë rrezik për bagëtitë dhe banorët e zonës.
Rasti, sipas policisë, është raportuar sot më 8 tetor 2025, ndërsa ngjarja dyshohet të ketë ndodhur më 4 tetor 2025.
Kështu ka bërë të ditur për teve1.info, zëdhënësi i Policisë së Kosovës për rajonin e Prizrenit, Shaqir Bytyqi.
Pas konsultimit me prokurorin kompetent, policia ka vendosur të mbajë shënim për rastin dhe ka apeluar tek qytetarët për kujdes të shtuar, sidomos gjatë lëvizjes në zonat e pyllëzuara apo afër vendbanimeve ku mund të shfaqen kafshë të egra.
