Kryetari i Bujanocit, Ragip Arifi, në lidhje direkte nga Bujanoci ka treguar se me ambasadorin e Shteteve të Bashkuara të Amerikës në Serbi, Christopher Hill, pas vizitës së tij në Luginën e Preshevës, kanë folur rreth pasivizimit të shqiptarëve nga ana e organeve shtetërore të Serbisë.
Për çështjen e ndaljes së proceseve administrative që i fshijnë adresat e shqiptarëve, dhe problemeve tjera të shqiptarëve në Luginën e Preshevës, Arifi ka thënë se ambasadori Hill i ka premtuar një mesash të fuqishëm që këto çështje sipas tij, duhet të ndalen menjëherë.
Arifi, ka thënë se Hill ka dhënë një premtim që javën e ardhshme do të ketë një takim me presidentin e Serbisë, Aleksandar Vuçiq dhe me kryeministren, Ana Bërnabiq, dhe aty do t’i diskutojë problemet e shqiptarëve.
“Ai më premtoi se do të japë një mesazh të fuqishëm të politikës amerikane se kjo çështje e shqiptarëve duhet të ndalet menjëherë, dhe unë në këtë drejtim po i besoj ShBA-ve dhe ambasadorit Hill se ka fuqi, ka mundësi, që këtë çështje ta kryej”, ka thënë ai në emisionin “Ditari” në Tëvë1.
Gjithashtu, sipas Arifit, Hill ka diskutuar edhe për marrëveshjen e dakorduar në Ohër, ku ka thënë se edhe pse nuk është e nënshkruar, ajo është e obligueshme që të implementohet.
“Po ashtu, ambasadori një theks të veçantë i dha edhe marrëveshjes së Ohrit mes presidentit Vuçiq dhe kryeministrit, Albin Kurti edhe pse ajo marrëveshje nuk është nënshkruar, sipas ambasadorit është e obligueshme për të dyja shtetet, marrëveshja duhet të implementohet në të gjitha pikat që kanë rënë dakord”, ka thënë Arifi.
