Kryetari i Komunës së Preshevës, Shqiprim Arifi ka thënë se është keqpërdorur fondi i ndarë nga Qeveria e Kosovës për Luginën e Preshevës.
Ai ka kërkuar shkarkimin e këshiltares së kryeministrit, Ardita Sinanin dhe ambasadorin e Kosovës në Britani të Madhe, Ilir Kapitin.
“Pres nga Qeveria Kurti dhe Albin Kurti i cili është paraqit qe 20 vite që është kundër hajnisë e korrupsionit, që të nxjerr konsekuenca të menjëhereshme në drejtim të asaj që të shkarkojë personat që kanë marrë pjesë në këtë zhvatje, ambasadori në Britani Ilir Kapiti dhe këshiltarja Ardita Sinani”, ka thënë ai në Ditari në Tëvë 1.
Po ashtu ai ka kërkuar nga Prokuroria Speciale e Kosovës që ta hetojë këtë çështje me prioritet.
“Po ashtu pres që të fillojnë hetimet për këtë zhvatje, sepse kjo zhvatje është e paprecedentë, flasim për 1.3 milionë euro që janë avullu nëpër xhepa të njerëzve të lidhur ngushtë me Ardita Sinanin dhe Shaip Kamberin. Kështu do të tregonte që Qeverisa e tij nuk është vetëm fjalë por edhe vepër. Për të cilën mua më shumë po më duket që është fjalë. Prokuroria Speciale duhet ta marrë me seriozitet të lartë, ta azhornojë me tempo të duhur këtë padi, duhet t’i marrë në pyetje të gjithë ata që janë paditur sepse ne dyshojmë që ka pas organizim kriminal dhe keqpërdorim të pozitës zyrtare nga Sinani, nga Ilir Kapiti dhe të tjerë të cilët janë pjesëmarrës”, ka shtuar ai.
Arifi ka thënë se nga ky fond janë dhënë 50 mijë euro për një artist që kishte recituar 5 poezi.
“Unë e kam paralajëmruar edhe kryeministrin e Qeverinë se si duhet të shkohet. Na kemi pasur propozim konkret të Fondit të Solidaritetit të cilët do t’i kishin shkuar qytetarëve të Preshevës e jo disa njerëzve të selektuar nga Albin Kurti. P.sh dikush i fitoi 50 mijë euro për me i recitu 5 vjersha, një pseudoartist. Tash e blen ni kerr të ri, një shpi të re”, ka shtuar ai.
Duke iu përgjigjur kryetarit të Këshillit Kombëtar Ragmi Mustafit se një padi e tillë do të duhej të dorëzohej edhe në Beograd, ai është përgjigjur se nuk e njeh Beogradin sa ai.
“Me Beograd ai ka përvojë, une s’kam. Ata janë ekspertë në bashkëpunim me Beogradin, une s’jam. Unë nuk po luftoj për paratë e mia, këto janë paratë e shqiptarëve në Luginë. Une po luftoj që mos me leju me u zhvat në këtë formë. Ai, Shaipi, Ardita e din më mirë Beogradin. Unë jam që 8 vite në politikë ata që 25 vite”, ka shtuar Arifi.
Ndryshe sot Kryetari i Komunës së Preshevës, Shqiprim Arifi, ka dorëzuar Kallëzim Penal në Prokurorinë Speciale në Prishtinë, kundër Këshillit Kombëtar Shqiptar me pretendimet se ky këshill i ka keqpërdorur mjetet e ndara nga Qeveria e Kosovës për Luginën.
