Arifi gjatë emisionit “Ditari” në Tëvë1 theksoi se Kosova nuk ka problem në aspektin ligjor dhe procedural për anëtarësim në Këshillin e Evropës. Sipas tij, i gjithë problemi ka qenë politik.
“Realisht nëse shikojmë nga aspekti ligjor, procedural, Kosova i përmbush të gjitha kriteret, madje edhe më mirë se disa shtete që janë anëtare të Këshillit të Evropës, pra shtetet e Evropës Juglindore. Kështu që në këtë pikë, Kosova nuk ka problem, problemi ka qenë politik. Tash me përjashtimin e Rusisë është hapur mundësia që të mos ketë as kundërshtime, pra aty duhen dy të tretat e votave në Asamblenë Parlamentare”, tha ai.
Arifi tutje tha se ky aplikim që ka bërë sot Kosova është vetëm një hap formal duke thënë se Qeveria dhe Parlamenti i Kosovës duhet të lobojnë te vendet anëtare të KE-së që të përshpejtohen procedurat.
“Aplikimi sot që bërë Republika e Kosovës është një hap i parë, formal, procedural, pra tash varet nga procedurat e brendshme siç është Komiteti i Ministrave, mandej vjen Asambleja Parlamentare por nuk ka përfunduar asgjë, kjo vetëm ka filluar. Tash duhet Qeveria e Kosovës si tërësi por edhe Parlamenti i Kosovës që të lobojnë te vendet anëtare që janë atje sepse beteja vetëm sa ka filluar, prandaj duhet të lobojnë që të përshpejtohet procedurat”, tha Arifi në Tëvë1.
Këshilli i Evropës është organizatë e cila qëllim promovon bashkëpunimin ndërmjet anëtarëve të saj në fushën e mbrojtjes së të drejtave të njeriut, demokracisë dhe sundimit të ligjit.
