Përmes një postimi në Facebook, Shqiprim Arifi e ka kritikuar Shaip Kamberin duke thënë që i ka ofruar barkën e suksesit mirëpo ai e ka fundosur atë, transmeton teve1.info.
“Trajektorja e suksesit e cila solli kandidatin e listës tjetër në mandatin e tij të deputetit në legjislacionin e kaluar, ishte ALTERNATIVA DEMOKRATIKE SHQIPTARE, gjegjësisht Marrëveshja e Tiranës – të cilën ai e braktisi atë për të themeluar një tjetër, një të dytë sepse kështu pretendonte të shpallej lider suprem i përfaqësuar në të gjitha nivelet e pushteteve, si në Preshevë (ani pse i humbi zgjedhjet), ashtu në Bujanoc (ani pse i humbi zgjedhjet) dhe gjithashtu në Medvegjë, tani nën “organin e dhunshëm të zgjedhur drejtpërdrejt nga Beogradi Nuk kam asgjë kundër strategjisë së tij, bile i ofrova barkën e suksesit. Por ja që ai e fundosi atë. Në fakt po mos t’i kishte rrezikuar dhe kërcënuar koalicionin qeverisës në Bujanoc, as dy “partnerët” e tij nuk do t’i kishte në listë”, ka thënë Arifi.
Më tej Arifi ka shkruar se nuk kishte se çfarë t’i uronte Kamberit pasi që nuk kishte parë ndonjë lloj suksesi në zhvillimin e fundit politik ku sipas tij të gjithë kishin dalë të humbur.
“Tani, çka dëshiron ai t’i uroj? Votat e tij nga Shumadia? Apo, mospërfaqësimin e shqiptarëve në Kuvendin e Republikës së Serbisë, nga tre në zero? Unë, nuk kam parë ndonjë lloj suksesi t’i uroj atij apo kujtdo tjetër në zhvillimin e fundit politik. Jemi të gjithë të humbur. Sepse ashtu deshi, shumë për vete, pak për të tjerët dhe në fund humbën të gjithë”, është shprehur më tej Arifi.
Partitë shqiptarë në Luginën e Preshevës kanë garuar me dy lista zgjedhore më 3 prill për zgjedhjet parlamentare dhe presidenciale në Serbi.
Në garë ishin koalicioni i Shqiptarëve të Bashkuar me bartës liste, Shaip Kamberi dhe Alternativa Demokratike Shqiptare me bartës liste, Shqiprim Arifi.
Postimi i plotë i Arifit:
Në vend të kujdesit kush mbi kë fitoi, problem mbetet edhe fakti që është shkelur një Marrëveshje e përbashkët, e të gjithëve, ndërsa vazhdon të jetë problem egocentrizmi dhe dëmtimi i proceseve kombëtare, e pafalshme mbetet përçarja, që për rrjedhojë solli humbjen e betejës – në luftë kundër çdo mekanizmi diskriminues.
Traektorja e suksesit e cila solli kandidatin e listës tjetër në mandatin e tij të deputetit në legjislacionin e kaluar, ishte ALTERNATIVA DEMOKRATIKE SHQIPTARE, gjegjësisht Marrëveshja e Tiranës – të cilën ai e braktisi atë për të themeluar një tjetër, një të dytë sepse kështu pretendonte të shpallej lider suprem i përfaqësuar në të gjitha nivelet e pushteteve, si në Preshevë (ani pse i humbi zgjedhjet), ashtu në Bujanoc (ani pse i humbi zgjedhjet) dhe gjithashtu në Medvegjë, tani nën “organin e dhunshëm të zgjedhur drejtpërdrejt nga Beogradi”.
Nuk kam asgjë kundër strategjisë së tij, bile i ofrova barkën e suksesit. Por ja që ai e fundosi atë. Në fakt po mos t’i kishte rezikuar dhe kërcënuar koalicionin qeverisës në Bujanoc, as dy “partnerët” e tij nuk do t’i kishte në listë.
Tani, çka dëshiron ai t’i uroj? Votat e tij nga Shumadia? Apo, mospërfaqësimin e shqiptarëve në Kuvendin e Republikës së Serbisë, nga tre në zero? Unë, nuk kam parë ndonjë lloj suksesi t’i uroj atij apo kujtdo tjetër në zhvillimin e fundit politik. Jemi të gjithë të humbur. Sepse ashtu deshti, shumë për vete, pak për të tjerët dhe në fund humbën të gjithë!
Demagogjia e tij politike e spikatur me cinizëm, për të akuzuar dikë tjetër me atë që ka bërë vet, është kulminacioni i ideologjisë farsë mashtruese. Lëre që kanë votuar pushtete qendrore, kanë bërë koalicione lokale me ta, por edhe kanë lobuar për ish-kandidat për postin e presidentit të Republikës së Serbisë. Andaj unë nuk jam si ata, nuk isha dhe kurrë nuk do të jem inferior ndaj asnjë kombësie tjetër në këtë planet e veçanërisht ndaj serbëve.
Për më tepër, politikat diferencuese për të sunduar i kam refuzuar gjithmonë, prandaj i ofroj të gjithëve ashtu siç i ofroj atij bashkëpunim në kauzat kombëtare shqiptare, por që duhet të distancohet sa më parë nga dakordimi i KNSH-së me ministren për të Drejtat e Njeriut dhe Pakicave në Qeverinë e Serbisë, Gordana Çomiq, kinse nuk ka çregjistrim të shqiptarëve nga librat amzë!
Koha deri në krijimin e mandateve të reja duhet të jetë një periudhë e fortë reflektimi për të gjithë, për të vlerësuar me pjekuri dhe përgjegjshmëri ecurinë, aspektet ku duhet përmirësuar cilësisht sistemi i qasjes politike dhe shfrytëzimin e të vetmes armë që kemi në duar si minoritet shqiptar nën administrimin serb, e që është unifikimi dhe Vota e përbashkët.
