Arif Muçolli mban emrin e axhës së tij që ra dëshmor në betejën e vitit 1944 në Herticë të Podujevës.
I lindur pikërisht në atë fshat, ai mban emrin me plot krenari.
“Axhë e kam pas Arif Muçollin dhe kam pas fatin që baba im të më emëron me emrin e tij në mënyrë që të trashëgohet emri i axhës i cili faktikisht në nëntor të 1944 është vrarë në këtë vend ku jemi ne sot”, tha Arif Muçolli.
E në këtë ditë ai erdhi t’i përkujtojë të gjithë dëshmorët që dhanë jetën në mbrojtje të kufirit.
Por përveç se trashëgoi emrin, ai u bë pjesë e Ushtrisë Çlirimtare të Kosovës në luftën e fundit në Kosovë.
“E kam pas fatin që ta trashëgoj emrin por njëkohësisht edhe sakrificën sepse kam pas fatin të jem edhe pjesëtar i luftës të Ushtrisë Çlirimtare të Kosovës e cila e ka përmbyll një kapitull të tërë të gjithë historisë sonë e cila me zbulimin e këtij lapidari tregon se ky popull ka sakrifiku ka derdh gjak ka dhënë gjak për liri”, tha ish-pjesëtari i UÇK-së.
Sipas tij, pllaka përkujtimore është ngritur vonë pasi është dashur të bëhet para 25 viteve./teve1.info/
