Pa Mesin në fushë dhe pa sulmuesin kryesor Lautaro Martinez, Argjentina kualifikohet në Botëror, e mbi të gjitha poshtëron rivalin e përhershëm Brazilin, duke e mposhtur thellë 4:1.
Në klasiken e futbollit, kampionia e botës ishte e frikshme ndaj kampionit të pesëfishtë të botës, duke e vendosur fatin e sfidës, brenda 37 minutave.
Hulian Alvarez shënoj në minutën e katërt, pastaj Enzo Fernandez në të 12-në për epërsinë e hershme të vendësve.
Në mes të golave të Argjentinës, Kunja i dha shpresë “selesaos” me golin për 2-1 në minutën e 26-të, para se Mekallister të rikthente avantazhin e dy golave, për një pushim të qetë para pjesës së dytë.
Djali i Diego Pablo Simeones, Zhuliano, vulosi rezultatin 4-1 në minutën 71’, ndërsa epërsia e vendasve në Stadiumin Monumental në Buenos Aires ishte po aq e thellë sa shifrat në tabelë.
Argjentina pati 12 gjuajtje ndaj 3 të rivalit, nga të cilat 7 në kuadrat, ndërsa Brazili pati vetëm një goditje në portë, atë të golit.
Me këtë fitore, kampionët e botës kanë 31 pikë dhe do të jenë në Botërorin amerikan në 2026.
Brazili, ndërkaq, është në vendin e katërt me vetëm 21 pikë dhe i duhet të luftojë shumë për t’u kualifikuar.
Habi e vërtetë për një ekip që në formacion ka emra si Vinisius, Markinjos apo Rodrigo.
