La Liga ka njoftuar se ka hequr dorë nga organizimi i ndeshjes Villarreal – Barcelona në Miami të SHBA-së.
Liga spanjolle bëri të ditur se anuloi vendimin për shkak të paqartësive që u shfaqën ditët e fundit në Spanjë.
Përballja Villarreal – Barcelona është caktuar të luhet më 20 dhjetor, por jo në Miami dhe shkas për këtë duket se janë bërë protestat nëpër stadiumet e shumta të Spanjës.
Në fillim të tetorit liga njoftoi se ka zhvendosur ndeshjen në Florida, por kjo solli reagime të shumta në Spanjë.
Lojtarët, përfshirë edhe ata të Villarrealit e Barcelonës protestuan duke qëndruar pa lëvizur për 15 sekonda në ndeshjet e fundit, gjë që nuk u shfaq në transmetuesit zyrtarë.
Liga spanjolle ka vlerësuar se projekti prezantonte mundësi unike për “ndërkombëtarizimin e futbollit spanjoll”.
