Këtë veprim ministrja e Drejtësisë, Albulena Haxhiu tha se e bëri pas konsultimeve me zyrtarë të ambasadës amerikane, duke marrë parasysh situatën aktuale politike.
Udhëtimin përtej oqeanit të planifikuar për javën tjetër e anuloi edhe kryetari i Podujevës Shpejtim Bulliqi, me arsyetimin e njëjtë.
Megjithatë, akterë të shumtë vlerësuan se ShBA ndërmori këtë veprim ndaj zyrtarëve të pushtetit, si ndëshkim për mosdëgjueshmërinë e qeverisë për shtyrjen e afatit për targa.
Nënkryetarja e PDK-së, Vlora Çitaku thotë se me këtë akt SHBA-ja qortoi qeverinë.
“Nga ato që kam parë në media më shumë duket si qortim, kështu ta përdori gjuhën e kryeministrit. Po shpresoj që institucionet e RKS ta kenë marrë mësimin. Raporti me ShBA-në është jetik për fuqizimin e subjektivitetit ndërkombëtar të Kosovës”, tha ajo.
Sipas ish-ambasadores, aleanca me SHBA-në duhet të ushqehet e kultivohet.
“Aleancat janë po aq të rëndësishme sa edhe sovraniteti. Fatkeqësisht kemi të bëjmë me një lidership institucional dhe politik i cili si duket ka keqkuptuar apo nuk i ka lexuar drejt dhe si duhet rekomandimet e miqve dhe aleatëve. Shtyerja e vizitës lexohet në këtë kontekst”, shtoi ajo.
Për analistin politik Visar Xani ky është një veprim tipik amerikan ndëshkues, që lidhet tërësisht me ngjarjet e fundit.
“ShBA-ja e ka mekanizmin kryesor që të kontrollojë liderët politikë dhe proceset politike në Kosovë përmes ndalesave, listës së zezë dhe është i vetmi mekanizëm zyrtar legjitim të cilin mund t’i kontrolloj dhe shtyjë përpara interesat e veta”, tha Xani.
Ndryshe nga zyrtarët e pushtetit, kryetarët e partive më të mëdha opozitare, Memli Krasniqi e Lumir Abdixhiku do të udhëtojnë së shpejti për në SHBA.
Kronika e gazetarit Gojart Jashari.
