Presidentja e Kosovës, Vjosa Osmani, ka vizituar kompaninë Koshi Group në Prizren, e cila është bërë e njohur për prodhimin e mjeteve luksoze si vetura sportive dhe anije moderne – të gjitha me vulën “Made in Kosova”.
Gjatë vizitës, Presidentja u shpreh e impresionuar nga puna dhe suksesi i kompanisë, duke theksuar se kjo është një dëshmi e potencialit të madh që ka Kosova në fushën e inovacionit dhe prodhimit.
“A e keni ditur se në Kosovë prodhohen edhe anije? Ky është një shembull i jashtëzakonshëm i mjeshtërisë dhe vizionit që kemi si shtet. Koshi Group është dëshmi e asaj se me punë dhe përkushtim, Kosova mund të jetë konkurruese në tregun global,” u shpreh Osmani.
Kompania, me bazë në Prizren, prodhon mjete që eksportohen në tregje të ndryshme ndërkombëtare dhe është kthyer në një model suksesi për ekonominë vendore dhe frymëzim për të rinjtë.
Presidentja vlerësoi se përkrahja për bizneset e tilla është jetike për zhvillimin ekonomik dhe për promovimin e imazhit të Kosovës në botë si vend i mundësive, inovacionit dhe talentit.
