Aktorja amerikane Angelina Jolie po planifikon të shesë vilën e saj luksoze në Los Angeles dhe të shpërngulet jashtë Shteteve të Bashkuara, njoftoi revista People.
Burime pranë aktores bëjnë me dije se Jolie po shqyrton disa vende të ndryshme për vendbanimin e ri dhe synon të bëjë këtë ndryshim vitin e ardhshëm, kur binjakët e saj më të vegjël, Knox dhe Vivienne, të mbushin 18 vjeç.
Sipas burimeve, Jolie nuk ka dashur kurrë të jetojë përgjithmonë në Los Angeles, por ishte e detyruar të qëndronte aty për shkak të marrëveshjes së kujdestarisë me ish-bashkëshortin Brad Pitt.
“Ajo do të ndihet shumë e lumtur kur të largohet nga Los Angeles”, tha një burim për mediat.
Në një intervistë të mëparshme me The Hollywood Reporter, aktorja kishte shprehur dëshirën për t’u larguar nga qyteti.
Vila luksoze që Jolie bleu në vitin 2017 për 24.5 milionë dollarë ka histori të veçantë, pasi më parë ishte në pronësi të regjisorit legjendar Cecil B. DeMille.
Shtëpia përfshin gjashtë dhoma gjumi, 10 banjo, një kopsht të madh me pishinë, palestër dhe shumë hapësira të tjera luksoze.
