Demolli në emisionin “InfoNata” në Tëvë1, ka shpjeguar mesazhin e fjalisë “Le të hanë tortë” që u përdor në aksionin e sotëm para Qeverisë.
“Një vit qeverisje Kurti neve na i kujtoi shprehjen e famshme të mbretëreshës franceze, Maria Antonete e cila kur i kishin shkuar t’i thonin që populli nuk ka bukë me honger ajo kishte thënë por le të han torte pra. Dhe kështu neve na është dukur një vit qeverisje Kurtit e cila përveçse u karakterizua me përkeqësim të gjendjes së mirëqenies së qytetarëve të Kosovës, me krizën me pandeminë, me izolim fizik dhe politik dhe shumë probleme të tjera, u karakterizua edhe me shtrembërim të vërtetave”, ka thënë ajo.
Sipas saj, Qeveria në vazhdimësi ka thënë të pavërteta siç është rasti me krizën energjetike.
“Kryeministri dhe Qeveria në vazhdimësi kanë thënë ato të cilat në realitet nuk ishin të vërteta siç është rasti me krizën energjetike dhe me faturat e larta të energjisë të cilat qytetarët po reagonin ndaj tyre në ndërkohë që kryeministri thoshte ne nuk i kemi ditur më parë sa na kanë ardhur fatura dhe nuk janë të larta”, tha Demolli.
Ajo thotë se shprehja e mbretëreshës franceze, Maria Antonete “Let them eat cake”, ua ka rikujtuar qeverisjen e “Kurtit”, pasi sipas saj kjo qeveri është karakterizuar me këtë lloj komunikimi në raport me qytetarin.
“Kjo qeveri u karakterizua me këtë lloj disonance në komunikimin në raport me qytetarin dhe për këtë arsye kjo shprehje e mbretëreshës franceze atëherë na i kujtoi qeverisjen sot të Kurtit”, tha më tej Demolli. /teve1.info/
