Anëtari i Lëvizjes Vetëvendosje në Komisionin Qendror të Zgjedhjeve , Alban Krasniqi në emisionin “Info Nata” në Tëvë1 ka reaguar pas raportimeve për manipulim të mundshëm në numërimin e votave në Mitrovicën e Jugut, ku kandidati i LVV-së, Faton Peci është shpallur fitues ku, ka qenë në balotazh me Arian Tahirin.
Krasniqi ka mohuar kategorikisht se ka pasur ndonjë manipulim nga ana e përfaqësuesve të LVV-së në procesin zgjedhor.
“Absolutisht jo. Arsyeja pse po përhapen këto pretendime është e qartë – dhe përgjigjen më të saktë e më të lehtë mund ta marrin nga vetë anëtarët e tyre që janë në Komisionet Komunale të Zgjedhjeve, sepse ata e dinë shumë mirë si ka shkuar procesi,” ka deklaruar Krasniqi.
Ai shtoi se këto akuza po orkestrohen për qëllime politike, duke përmendur disa emra të Partisë Demokratike të Kosovës.
“Besoj se kësaj situate po i kontribuojnë edhe vetë përfaqësues të tyre, përfshirë kryetarin Memli Krasniqi, por edhe me gjasë Sami Lushtakun. Kjo po shihet qartë si një projekt për ta cenuar integritetin e procesit dhe për të vënë në pikëpyetje vullnetin e qytetarëve për votën e lirë në balotazhin e 9 nëntorit,” ka theksuar ai.
Krasniqi ka bërë të ditur se probleme teknike të ngjashme janë shfaqur edhe në komuna të tjera, përfshirë Gjakovën.
“Më lejoni t’ju them se probleme të tilla teknike janë shfaqur edhe në Komunën e Gjakovës, ku është hasur një kod i vendvotimeve të tjera. Edhe atje, çuditërisht, problemi është evidentuar menjëherë, por askush nuk e ka përmendur,” ka thënë më tej ai.
Sipas Krasniqit, të gjitha këto çështje janë pjesë e procesit normal teknik dhe nuk kanë ndikuar në rezultatin përfundimtar të zgjedhjeve.
