Sipas Andonit do të ishte shumë pozitive që president i Shqipërisë të zgjidhej një personalitet nga Kosova, pasi konsideron se në atë formë do të bëhej një lloj bashkimi kombëtar.
“Për shqiptarët të paktën në rrethe të ndryshme dhe për shembull për mua personalisht është jashtëzakonisht pozitive dhe mendoja se një figurë e tillë do na bënte shumë mirë për atë bashkimin tonë që ne e presim. Vërtet nuk mund ta bëjmë momentalisht me instrumentat e të Drejtës Ndërkombëtare, por mund ta bënim realisht duke shkrirë disa ujëra”, është shprehur Andoni në emisioni “InfoNata” në Tëvë1.
Andoni ka thënë se kryeministri i Shqipërisë, Edi Rama deri tani ka ditur që afër vetës të angazhojë figura nga Kosova, megjithatë Andoni është skeptik se palët në Shqipëri nuk do të bien dakord për një president nga Kosova.
“Rama, për hirë të vërtetës, ka treguar në drejtimin e tij që me afrimin e shumë individëve kosovarë ka pasur një filozofi që i kaloi paraardhërsit e tij. Por nuk besoj që palët në Shqipëri do të bien dakord për përfaqësuesin nga Kosova. Për arsyen e vetme që unë besoj që kushdo që të zgjedhet nga Kosova do jetë figurë me shumë personalitet dhe nuk do të bëhet pjesë e lojërave të politikës shqiptare”, ka vlerësuar Andoni.
Presidentit aktual të Shqipërisë, Ilir Meta i përfundon mandati në muajin korrik të këtij viti, ndërsa kohëve të fundit janë përmedur disa emra nga Kosova si kandidatë të mundshëm për president të shtetit shqiptar. /teve1.info/
