Andi Pajaziti është liruar nga akuza për vrasje e K.R., më 4 gusht 2023, në lokalin “Bon Vivant” në Prishtinë.
Gjykatësi Gashi tha se i akuzuari Pajaziti lirohet nga pika e parë e dispozitivit të aktakuzës për “Vrajse të kryer në gjendje të tronditjes së fortë mendore”, pasi ka rrethana që përjashtojnë përgjegjësinë penale, përkatësisht veprimet e Pajzitit janë në kuadër të mbrojtjes së nevojshme.
Pajaziti është dënuar me 2 vjet burgim për armëmbajtje pa leje.
Tutje bëhet e ditur se atij i është ndërprerë edhe masa e paraburgimit.
Pajaziti në seancën gjyqësore të mbajtur në korrik të vitit të kaluar ishte deklaruar i pafajshëm për vrasjen e cila ka ndodhur më 4 gusht të vitit 2023. Ai kishte thënë se veprën e ka kryer në vetëmbrojtje. Ndërsa, për armëmbajtje pa leje, ishte deklaruar fajtor.
Ndryshe, në këtë rast i ndaluar ishte edhe N.Ll., i dyshuar për veprën penale “Dhënia e ndihmës pas kryerjes së veprave penale”, të cilit më 5 shtator iu caktua masa e paraburgimit në kohëzgjatje prej një muaji. Të njëjtit, pas një muaji nga kjo masë, i është ndërprerë paraburgimi, pasi nuk kishte kërkesë nga Prokuroria për vazhdimin e paraburgimit. Kurse, Gëzim Zakuti dhe Hisni Gecaj, si të dyshuar për përfshirje në këtë rast, më 29 gusht 2023 ishin liruar nga masa e paraburgimit. I dyshuari tjetër për përfshirje në këtë rast, Dukagjin Nikollaj, gjendet në arrati.
Prokuroria Themelore në Prishtinë, më 5 gusht 2023 njoftoi se të gjithë të dyshuarit për përfshirje në rastin “Bon Vivant”, kanë të kaluar kriminale.
Lidhur me rastin e 4 gushtit, Shërbimi Spitalor Klinik dhe Universitar i Kosovës kishte njoftuar se 17 persona janë lënduar, kurse njëri prej tyre vdiq si pasojë e plagëve të marra. Rasti thuhej se ndodhi si pasojë e një mosmarrëveshjeje mes të pandehurve.
Policia e Kosovës e kishte konfirmuar në orët e para të 5 gushtit se në incidentin që ka ndodhur në një lokal në qendër të Prishtinës ka persona të plagosur me armë zjarri, por edhe nga copat e xhamave./teve1.info
