Trajneri i Real Madridit, Carlo Ancelotti, ka konfirmuar se tashmë e ka marrë një vendim në lidhje me të ardhmen e tij profesionale, por nuk ka ndërmend ta bëjë publik përpara përfundimit të kampionatit spanjoll.
Në një prononcim për mediat, tekniku italian u shpreh me tone të qarta dhe të balancuara, duke nënvizuar përkushtimin e tij të plotë ndaj objektivave aktualë të klubit madrilen:
“E di çfarë do të bëj, por nuk do ta zbuloj para fundit të La Ligës. Respektoj Real Madridin dhe e dua këtë klub. Nuk mund të jap asnjë koment për të ardhmen time para datës 25 maj.”
Duke folur për marrëdhënien me klubin, Ancelotti theksoi se ajo ka qenë gjithmonë e qetë dhe profesionale, pa asnjë tension apo konflikt:
“Nuk kam pasur kurrë probleme me Real Madridin dhe nuk do të kem. Kur të vijë momenti për t’u larguar, ai do të jetë një moment i bukur. E dua këtë klub dhe ndjej dashurinë që më kthen mbrapsht. Do të jetë një ndarje speciale, për mua dhe për Real Madridin.”
Përkundër spekulimeve të vazhdueshme që e lidhin atë me kombëtaren e Brazilit, Ancelotti i ka shmangur komentet direkte. Sipas burimeve të afërta me federatën braziliane, një marrëveshje verbale ekziston që prej së hënës, por federata është e gatshme të presë deri në fund të sezonit për një përgjigje zyrtare.
