Në fillim të javës së ardhshme ka gjasa që të shpërndahet Kuvendi i Kosovës.
Kjo pas nismës që ka ndërmarrë Partia Demokratike e Kosovës.
Një gjë të tillë e konfirmoi mbrëmë në emisionin “Info Nata” në Tëvë1, deputetja e kësaj partie, Ariana Musliu – Shoshi.
Por për këtë ajo tha se duhet të kenë koordinim me shefat e grupeve parlamentare.
“Besoj se gjasat reale janë që të ndodhë, por duhet të kemi koordinim me shefat e grupeve parlamentare si të Aleancës për Ardhmërinë e Kosovës ashtu edhe të Lidhjes Demokratike”, ka thënë ajo.
E sipas saj, data të mundshme për zgjedhje të reja mund të jenë 30 qershori dhe 7 korriku e më së largu më 14 korrik.
“Na duhet 80 vota dhe një gjë e tillë do të ishte në të mirë të vendit tani për tani… Data të mundshme për zgjedhje të reja mund të jenë 30 qershori apo 07 korrik, më e largëta 14 korrik. Çdo datë që shtyhet më vonë se këto të propozuara, ne si PDK nuk e vlerësojmë që ia vlen të kemi zgjedhje në vendin tonë, pasi e kemi parasysh që korriku dhe gushti janë pushim e pastaj mbesin edhe tre muaj që ligjërisht do të duhej të thirr presidentja zgjedhje të rregullta”,ka deklaruar ajo.
E sipas analistit politik, Fidan Ukaj, duket se ka pasur një dakordim mes LVV-së e PDK-së për bashkim të votës.
“Me gjasë do të jetë kjo javë ose java tjetër brenda këtij muaji. Me gjasë ka pasur një akordim mes dy partive që pas kalimit në parlament të marrëveshjeve ndërkombëtare kërkesë që ka qenë nga LVV, siç duket kërkesa e PDK-së që të shkohet në proces të ri zgjedhor ka hasur mirëkuptim të LVV-së dhe do të ketë një bashkim të votës në mes të këtyre partive dhe një shpërndarje të kuvendit të Kosovës”, tha ai.
Gatishmëri për proces të ri zgjedhor kanë treguar edhe nga Lidhja Demokratike e Kosovës dhe Aleanca për Ardhmërinë e Kosovës, mirëpo sipas tyre, shpërndarjes së Kuvendit duhet t’i paraprijë shkarkimi apo dorëheqja e kryeministrit Albin Kurti.
Pa LDK-në dhe AAK-në, PDK-së e LVV-së u duhen votat e së paku 6 deputetëve të komuniteteve, që ende janë të papërcaktuar.
