Fundori i skuadrës së Pejës, Amin Hot është shpallur basketbollisti më i mirë për xhiron e 13-të në Superligën e Kosovës në basketboll.
Federata e Basketbollit të Kosovës, ka njoftuar të hënën se Hot e ka fituar çmimin “MVP i Javës” që ndahet për lojtarin më të mirë pas secilës xhiro.
Hot ishte më meritori për fitoren e Pejës ndaj Trepçës, duke e përfunduar ndeshjen me 13 pikë, 7 kërcime e 9 asistime.
Po ashtu, Hot është përfshirë edhe në “Top 5” të javës, të cilin e përbëjnë edhe Jay McKinnis e Mack Smith të Bashkimit, Jetmir Zeqiri i Borës dhe Trey Anderson i Vëllaznimit.
Dyshja McKinnis e Smith ndihmuan Bashkimin ta mposht Sigal Prishtinën, duke kontribuar me 17 pikë e 9 kërcime, përkatësisht 18 pikë, 5 kërcime e 7 asistime.
Jetmir Zeqiri pati 13 pikë, 9 kërcime e 5 asistime në triumfin e Borës ndaj Proton Cable Prizrenit, ndërsa Anderson me 13 pikë e 7 kërcime ndihmoi Vëllaznimin ta mposht Golden Eagle Yllin në Suharekë.
