Përmes komunikatës, Zyra e Kryeministrit njoftoi se Ziv u shpreh e nderuar të jetë ambasadorja e parë izraelite në Kosovë, teksa ka ftuar Kurtin për vizitë në Izrael.
“Kryeministri i Republikës së Kosovës, Albin Kurti, ka pritur sot në takim ambasadoren e Izraelit në Kosovës, znj.Tamar Ziv. Duke e uruar për detyrën, kryeministri Kurti shprehu kënaqësinë për takimin. Ai e falënderoi për njohjen e Republikës së Kosovës nga Izraeli. Ambasadorja tha se është e nderuar të jetë ambasadorja e parë e Izraelit në Kosovë, dhe e ftoi Kryeministrin për vizitë zyrtare në Izrael”, thuhet ndër tjerash në njoftim.
Tutje, gjatë takimit është biseduar edhe për mundësitë e bashkëpunimit në fushat e ekonomisë, bujqësisë, arsimit dhe kulturës.
“Kryeministri Kurti theksoi se me stabilitetin institucional është e mundshme që të planifikojmë më mirë e për periudha më afatgjata. Ai foli për angazhimin në një vit qeverisje për zhvillimin e ekonomisë, sundimin e ligjit dhe reformat në sistemin e drejtësisë. Kryeministri theksoi progresin e konsiderueshëm në zhvillimin ekonomik, duke veçuar rritjen ekonomike prej 10,53%, rritjen e eksporteve prej 83,6% , rritjen e Investimeve të Huaja Direkte prej 22% dhe rritjen e të hyrave tatimore prej 34%”, thuhet ndër tjerash në njoftim./teve1.info/.
