Ambasadori i Francës në Kosovë, Olivier Guerot, ka mirëpritur zhvillimet e mëngjesit të sotëm lidhur me Ligjin për të Huajt, i cili hyn në fuqi nga nesër, 15 mars.
Për këtë ligj dhe për Ligjin për Automjete, në një konferencë për media kanë folur emisari evropian për dialogun Kosovë–Serbi, Peter Sørensen, ambasadori i Bashkimit Evropian në Kosovë, Aivo Orav, dhe kryeministri i Kosovës, Albin Kurti.
“E mirëpres njoftimin e përbashkët nga Sorensen, Orav dhe kryeministri Kurti. Vullneti i mirë i të gjitha palëve ka bërë të mundur gjetjen e zgjidhjeve konkrete. Është thelbësore që veprimet e ndërmarra të mos kenë një ndikim negativ në kushtet e jetesës së komunitetit serb të Kosovës. E përgëzoj rolin proaktiv dhe shumë pozitiv të Bashkimit Evropian”, ka shkruar Guerot në një postim në X.
Ligji për të Huajt, që hyn në fuqi nga dita e diel, do të shoqërohet me disa masa shtesë, të cilat lidhen kryesisht me regjistrimin e banorëve serbë dhe personave me leje qëndrimi të përkohshme.
