Në njoftimin për media nga Zyra e kryeministrit thuhet se në këtë takim u riafirmua vazhdimësia në konsolidimin e marrëdhënieve të fuqishme të bashkëpunimit mes dy vendeve.
Po ashtu, ambasadori Grønbech-Jensen shprehu mbështetjen e Danimarkës ndaj aplikimit për anëtarësim të Kosovës në Këshillin e Evropës dhe e përshëndeti aplikimin për anëtarësim në Bashkimin Evropian, duke thënë se Kosova i përket familjes evropiane.
“Zëvendëskryeministri Bislimi tha se na pret një vit i rëndësishëm përpara, në të cilin do të vijojë përkushtimi i plotë i Kosovës në proceset e integrimit evropian, duke përfshirë zbatimin e Marrëveshjes së Stabilizim Asocimit dhe detyrimeve që rrjedhin nga agjenda evropiane. Sundimi i ligjit dhe transparenca e institucioneve, janë gjithashtu në fokus përgjatë këtij viti”, thuhet në njoftim.
‘’Tek Kosova, Danimarka gjen një partnere të besueshme, e cila ka bashkërenduar politikën e saj të jashtme me atë të Bashkimit Evropian dhe mban të njëjtin qëndrim ndaj agresionit rus në Ukrainë.’’ tha zëvendëskryeministri Bislimi.
Sipas njoftimit, ambasadori Grønbech-Jensen e vlerësoi lartësisht dhe angazhimin e Kosovës në mikpritjen dhe strehimin e qytetarëve afganë si dhe bashkëpunimin me partnerët ndërkombëtarë.
Në përfundim të takimit, u ritheksua përkushtimi në thellimin e bashkëpunimit në fushën e energjisë, veçanërisht energjisë së gjelbër e të ripërtërishme, po ashtu dhe në fushën e drejtësisë e bashkëpunimit ekonomik. /Teve1.info/
