Ambasadori i Mbretërisë së Bashkuar në Kosovë, Jonathan Hargreaves, vizitoi sot zyrën e kryesuesit të Komisionit Qendror të Zgjedhjeve, Kreshnik Radoniqi, për të diskutuar përgatitjet për zgjedhjet e 28 dhjetorit.
Përmes një postimi në Facebook, ambasadori britanik shprehu respekt për profesionalizmin e stafit të KQZ-së dhe për përpjekjet e tyre për të siguruar një proces zgjedhor të qetë dhe në përputhje me ligjet dhe procedurat e Kosovës.
“Si gjithmonë, isha i impresionuar me profesionalizmin e stafit të Komisionit Qendror të Zgjedhjeve kur i vizitova këtë mëngjes. Faleminderit Kreshnik Radoniqit dhe ekipit të tij për përpjekjet e pakursyera që zgjedhjet e ardhshme të përgjithshme të zhvillohen në mënyrë të qetë dhe në përputhje me ligjet dhe procedurat e Kosovës,” ka shkruar Hargreaves.
Takimi ndërmjet ambasadorit britanik dhe kryesuesit të KQZ-së vjen në një kohë kur institucionet zgjedhore po përgatiten intensivisht për zgjedhjet e ardhshme, duke synuar transparencë dhe pjesëmarrje të lartë të qytetarëve.
Hargreaves theksoi rëndësinë e ruajtjes së besueshmërisë së procesit zgjedhor dhe mbështetjes së institucioneve demokratike në Kosovë.
