Ambasada e Gjermanisë në Kosovë e ka mbështetur deklaratën e të dërguarit special të qeverisë gjermane për vendet e Ballkanit Perëndimor, Manuel Sarrazin, lidhur me çështjen e krijimit të qeverisë së re në Kosovë.
Ambasada gjermane përmes një postimi në Facebook thuhet se tashmë është koha që partitë në Kosovë të vënë përpara interesin e vendit dhe që të punojnë së bashku.
‘‘Ne jemi plotësisht dakord me mendimet e Dërguarit të Posaçëm Sarrazin në intervistën e tij të fundit. Tani është koha që partitë kosovare të vënë përpara interesin e vendit dhe të punojnë së bashku’’, thuhet në postim.
Ndërkohë, dje gjatë një interviste për DW në gjuhën serbe, Manuel Sarrazin, përfaqësuesi i Gjermanisë për Ballkanin Perëndimor, ka theksuar rëndësinë e formimit të shpejtë të qeverisë në Kosovë për të mundësuar një angazhim të mëtejshëm në dialogun me Serbinë.
Ai theksoi se ka ardhur koha për të intensifikuar përpjekjet për gjetjen e zgjidhjeve konkrete dhe se Peter Sorensen, dërguari i ri special i BE-së, është personi i duhur për të udhëhequr këtë proces./teve1.info/
