Pas tri jave u kthyen në sallën plenare.
Por, edhe në fillimin e ri, deputetët dhanë rezultatet e vjetra.
Pa rezultat përfundoi edhe seanca e parë për konstituimin e Kuvendit të Kosovës, pas aktgjykimit të fundit të Kushtetueses.
Publikimin e këtij të fundit, e kanë vlerësuar në ambasadën e Gjermanisë në Kosovës.
Nga kjo ambasadë për Tëvë1, u bëjnë thirrje deputetëve të veprojnë drejt një kompromisi.
Ne e vlerësojmë që Gjykata Kushtetuese ka dalë me një vendim procedural. Tani politikanët duhet të veprojnë në përputhje me rrethanat, në mënyrë që kosovarët më në fund të kenë parlamentin për të cilin votuan gjysmë viti më parë. Ne presim një zgjidhje të realizueshme brenda afatit dhe u bëjmë thirrje të gjithë aktorëve politikë të veprojnë drejt një kompromisi”, thuhet nga ambasada gjermane.
Të mërkurën u shënua edhe dështimi i 55-të për funksionalizimin e legjislativit.
Gjetjen e një zgjidhje para se te ndërhyjnë ndërkombëtarët, po e kërkojnë edhe analistët politik në vend.
“Një përpjekje ndërkombëtare ka qenë vazhdimisht, thirrje ka pas të vazhdueshme ndoshta nuk ka pasur shtytje direkt apo një masë sanksionuese ndaj politikanëve apo partive të caktuara në kuptimin e asaj që të mund të konsiderohet që nuk janë në pajtim me Kushtetutën apo duke i shkelur parimet e demokracisë së vendet, një gjë e tillë nuk ka ndodhur, ndoshta vijmë deri tek ajo fazë”, tha analisti politik, Avdi Smajljaj.
Por, cilat do të ishin pasojat nëse të zgjedhurit e popullit nuk arrijnë ta gjejnë gjuhën e përbashkët për kryetarin e nënkryetarët e organit ligjvënës?
“Vendet mbështetëse të Kosovës, shtetet e BE-së, Amerikës, Britania, ndoshta mund të marrin masa konkrete ndaj politikanëve apo partive të caktuara që ata e vlerësojnë se janë duke e sabotuar procesin e krijimit të institucioneve tek kjo fazë nuk kemi ardhur ende, ndërkombëtarët ende shpresojnë që partitë do të reflektojnë dhe do t’i kthehen normalitetit”, tha ai.
Seanca e radhës u caktua të premten nga ora 11:00.
Ndërsa edhe aktgjykimi i dytë i Gjykatës Kushtetuese, urdhëron që Kuvendi të konstituohet brenda 30 ditëve.
