Ambasada e Amerikës në Kosovë, ka njoftuar se të premten nga ora 15:00 deri në orën 21:00, në bashkëpunim me Policinë e Kosovës, do të zhvillojnë një ushtrim të përbashkët në shkallë të gjerë i cili përqendrohet në menaxhimin e krizave dhe reagimit ndaj emergjencave.
Sipas njoftimit, kjo bëhet për të forcuar bashkëpunimin në siguri dhe reagimin ndaj incidenteve të mundshme.
“Ky ushtrim do të përqendrohet në menaxhimin e krizave, koordinimin ndëragjencor dhe procedurat e reagimit ndaj emergjencave. Është pjesë e përpjekjeve të vazhdueshme të Shteteve të Bashkuara dhe Kosovës për të forcuar bashkëpunimin në siguri dhe për të siguruar gatishmërinë në reagimin ndaj një sërë incidentesh të mundshme. Ambasadat dhe konsullatat e Shteteve të Bashkuara shpesh kryejnë ushtrime me qëllim përgatitjen e punonjësve për emergjenca natyrore ose të shkaktuara nga njeriu. Në përgjithësi, këto arrihen përmes ushtrimeve të brendshme në tavolinë ose në shkallë të vogël. Megjithatë, marrëdhëniet dhe bashkëpunimi i fortë dypalësh midis Shteteve të Bashkuara dhe Qeverisë së Kosovës krijojnë një mundësi unike për të kryer një ushtrim të përbashkët, në shkallë të gjerë, me veprim të drejtpërdrejtë për menaxhimin e krizave në Kosovë”, thuhet në njoftimin e ambasadës.
Poashtu, paralajmërohet se gjatë këtyre ushtrimeve, mund të ketë ndërprerje të përkohshme të trafikut, përdorim të mundshëm të sirenave e altoparlantëve dhe gjithashtu prani të shtuar të personelit të Policisë së Kosovës dhe Ambasadës Amerikane.
“Gjatë ushtrimit, mund të ketë: Prani të shtuar të personelit të sigurisë së Policisë së Kosovës dhe Ambasadës Amerikane në afërsi të Ambasadës Amerikane dhe zonave të tjera të caktuara të trajnimit në Prishtinë; Ndërprerje të përkohshme të trafikut dhe devijime, duke përfshirë mbyllje afatshkurtra të rrugëve sipas udhëzimeve të Policisë së Kosovës; Përdorim i mundshëm i sirenave, altoparlantëve dhe efekteve të tjera trajnuese që mund të jenë të dukshme për banorët dhe kalimtarët”, thuhet mes tjerash në njoftim.
