Vinicius Junior nuk e ka kompletuar ende asnjë ndeshje këtë edicion të Real Madridit, nën urdhrat e trajnerit të ri Xabi Alonso. Kjo ka bërë që ylli brazilian të jetë i frustruar, ndërsa mediat në Spanjë i kanë kushtuar rëndësi të madhe situatës rreth tij, me gjithë fillimin e furishëm të Madridit.
Braziliani 25-vjeçar, që ka shënuar në triumfet e Real Madridit në finalet e Championsit në vitet 2022 e 2024, është zëvendësuar në dhjetë prej 12 ndeshjeve që kur Alonso e mori drejtimin e skuadrës në qershor. Alonso e zëvendësoi Carlo Ancelottin e larguar.
Vini mbeti në stol në dy ndeshje të tjera, duke përfshirë edhe ndeshjen e javës së kaluar në Champions kundër Olympique Marseille.
Ndeshja e së shtunës ndaj Espanyolit nxori në pah situatën e pazakontë. Viniciusi ishte kërcënim konstant në krahun e majtë, ndërsa asistoi në golin e Kylian Mbappes. Po ashtu e goditi shtyllën në njërën prej paraqitjeve më të mira këtë edicion. Por sërish Alonso e zëvendësoi atë, ndërsa braziliani la fushën me shenja të dukshme nervoze në drejtim të trajnerit.
Statistikat e bëjnë situatën edhe më interesante. Viniciusi është lojtari i dytë më i përfshirë në gola i Real Madridit, ndonëse është vetëm i dhjeti për minuta të luajtura.
Alonso është pyetur të hënën për politikën e tij të rotacionit. Ai nuk dha përgjigje të qartë, ndërsa pranoi pakënaqësinë e lojtarit yll.
“Edhe unë isha lojtar dhe kur jam zëvendësuar nuk më ka pëlqyer. Nuk mendoj se është gjë e madhe që lojtari shfaq frustrimin e tij”, ka thënë Alonso në konferencën për shtyp të mbajtur para ndeshjes së La Ligas ndaj Levantes, që zhvillohet të martën.
“Jam i kënaqur me atë që po e bën Vinicius Junior, jemi ende në fazë të hershme të kampionatit. Na duhen të gjithë, jam i lumtur dhe mund të paraqitemi edhe më mirë në pjesën e sulmit”, ka shtuar Alonso.
Tensionet megjithatë nuk kanë ndikuar në rezultatet e Real Madridit. Skuadra mbretërore udhëheq në La Lilga me 15 pikë nga pesë ndeshje. Ka dy më shumë se kampionia në fuqi, Barcelona.
