Zyrtarët e Partisë Demokratike të Shqipërisë, së bashku me simpatizantët e tyre, dolën në rrugë për të protestuar kundër qeverisjes së kryeministrit Edi Rama në Tiranë.
Protesta e zhvilluar të dielën nuk kaloi pa incidente. Gjatë saj u përdorën mjete shpërthyese të improvizuara, ndërsa tre punonjës të Policisë mbetën të lënduar.
Në një intervistë për Tëvë1, një nga figurat më të zëshme të Partisë Demokratike, deputeti Tomor Alizoti, shpjegoi arsyet që, sipas tij, i kanë shtyrë demokratët të protestojnë.
“Ka shumë arsye për të protestuar në Shqipëri. Zëvendëskryeministrja, numri dy i qeverisë, është e përfshirë në një skandal të madh. Bëhet fjalë për një skandal masiv, të lidhur me krimin e organizuar, që unë i quaj kartele. Këto kartele, në tregun evropian dhe botëror të kokainës, kanë arritur madje të ulin çmimin e saj. Kartelet e drogës në Shqipëri janë të lidhura drejtpërdrejt me kartelet e Amerikës Latine, që janë ndër më të fuqishmet në botë. Nga përgjimet e publikuara nga SPAK, del se zëvendëskryeministrja disponon rreth 300 apartamente”, ka thënë ai.
Alizoti akuzon kryeministrin Edi Rama për manipulim të zgjedhjeve në Shqipëri dhe pretendon se mediat janë të kontrolluara nga partia në pushtet.
“Nga përgjimet del se persona të mediave kërkojnë para për shërbimet që u kanë kryer Ballukut dhe shumë të tjerëve. Në çdo vend demokratik të botës, mediat merren me pushtetin, sepse pushteti e drejton vendin, jo me opozitën”, shprehet deputeti i PD-së
Sipas njoftimit zyrtar të Policisë, gjatë protestës janë arrestuar katër persona dhe janë proceduar penalisht shtatë të tjerë, nën dyshimet se kanë hedhur mjete shpërthyese të improvizuara (molotovë) dhe kanë kundërshtuar punonjësit e Policisë gjatë ushtrimit të detyrës.
Nga ana tjetër, kryetari i Partisë Demokratike, Sali Berisha, ka akuzuar Policinë për përdorim të dhunës dhe ka paralajmëruar përshkallëzim të protestave në ditët në vijim.
