Ish-shefi i hetimeve në Inspektoriatin Policor të Kosovës (IPK), Jetullah Aliu, ka deklaruar se trajnimet policore në ditët e sotme janë zbehur, krahasuar me të kaluarën.
Dëshmi e kësaj sipas Aliut është reagimi i pesë zyrtarëve policorë në rastin e vdekjes së 27-vjeçarit nga Lipjani të cilët siç ka theksuar ai vërehet se më shumë kanë pasur reagim emocional se profesional.
“Janë mbi 10 mijë zyrtarë policorë edhe duhet të izolohen rastet e veçanta. Jam shumë i sigurtë që pjesa dërmuese e tyre janë në nivelin më profesional. Unë vetë kam qenë pjesë e tyre për një kohë të gjatë në një periudhë kur trajnimet kanë qenë shumë më të avancuara, gjë që është zbehur me këto gjeneratat e reja…Nuk dua të paragjykoj për zyrtarët në rastin në fjalë se të cilave gjenerata janë, por po dyshoj që janë pak gjenerata më të fundit për arsye se reagimi i tyre vërehet se është pak emocional dhe jo menaxhues i mirë. Ju keni parë edhe trajnime të tilla që zyrtarët policorë trajnohen për fusha të ndryshme kur ka të bëjë edhe me eksploziv, mirëpo a janë zyrtarët ata të cilët i ndjekin disa trajnime të kësaj natyre aty kam pikëpyetje..”, ka thënë ai në emisionin “Këndi I Debatit” në Tëvë1.
