Ministri i Infrastrukturës, Liburn Aliu ka thënë se gjatë vizitës së tij sot në Leposaviq, KFOR-i i ka ofruar siguri.
Përmes një postimi në Facebook, ai ka thënë se Policia e Kosovës i ka udhëzuar që të mos vazhdojnë tutje, për ta shmangur tensionimin e situatës, përcjell teve1.info
“Lajmet se KFOR-i, më ka ndaluar që ta takoj Kryetarin e Komunës së Leposaviqit, z. Lulzim Hetemi, janë të pavërteta. Përkundrazi, KFOR-i na kanë ofruar siguri, me një njësit të tyre që e kanë dërguar pikërisht për këtë qëllim. Në fakt, ka qenë udhëzimi i Policisë së Kosovës që mos të vazhdojmë më tutje, me qëllim që të shmangim tensionimin e situatës nga bandat kriminale që silleshin përreth. Spekulimet e tilla, i’u shkojnë për shtati vetëm bandave që janë të instaluara aty, njëherit këto lajme të pavërteta po ashtu po e zhvlerësojnë punën e palodhshme dhe profesionale që Policia e Kosovës po e bën atje”, ka shkruar ai.
Sot në mediat vendore është raportuar se KFOR-i i ka ndaluar ministrit Aliu vizitën në Leposaviq. /Teve1.info/
