Ambasadori i Shqipërisë në Kosovë, Petrit Malaj gjatë një pritje për bizneset shqiptare të cilat operojnë në Kosovë komentoi edhe emërimin e ish-ministrit të infrastrukturës së Kosovës në Qeverinë e Kosovës, Liburn Aliu në krye të portit të Durrësit.
Malaj ka thënë se është i lumtur për një gjë të tillë, duke theksuar se ai port është jo vetëm i Shqipërisë, por i gjithë shqiptarëve.
“Po shkëlqyer, Liburni është miku im. Unë kam uruar Librunin, e kam marrë në telefon e kam uruar dhe jam shumë i kënaqur. Ai port siç u tha edhe sot në prezantimin e Liburnit nga zëvendëskryeministrja e Shqipërisë, ai port nuk është vetëm i Shqipërisë, ai port është i shqiptarëve, në Shqipëri, në Kosovë, në Maqedoninë e Veriut, pra është i të gjithëve dhe aty lëviz gjithçka. Është motori i ekonomive të vendeve respektive.”, tha Malaj.
Ndër të tjera, Malaj tha se ambasada po bën punë intensive për të funksionalizuar dhomën ekonomike dypalëshe, e cila sipas tij, do të thellojë edhe më tej bashkëpunimin ekonomik të dy vendeve.
“Aktualisht po punojmë intenzivisht për të finalizuar funksionalizimin e dhomës ekonomike dypalëshe, një projekt shumë i rëndësishëm i cili duhet pranuar se nuk ka avancuar në ritmin e duhur. Ambasada po i kushton vëmendje të veçantë këtij drejtimi dhe besojmë se së shpejti do të përmbyllet zbatimi praktik i deklaratës ndërqeveritare për krijimin e saj”, tha Malaj.
