Analisti politik, Artan Aliaj, debatet e fundit rreth gjyqtarit të Gjykatës Kushtetuese, Radomir Laban i ka cilësuar si pjesë të një loje politike për ta sulmuar këtë gjykatë për vendimet që priten prej saj.
Aliaj ka theksuar se që nga momenti kur presidentja e vendit, Vjosa Osmani e ka ngritur këtë temë, ajo ka qenë pak e pavend, pasi sipas tij, emri i Labanit është përdorur vazhdimisht nga partitë politike, sa herë që u është dashur për qëllime politike.
“Qysh në momentin e parë kur presidentja e ka ngritur këtë temë ka qenë pak nonsense, pasi që Laban ka qenë subjekt i partive politike qysh kur ka punu në Gjykatën Kushtetuese pa u bërë gjyqtar. Dihet shumë qartë sesi është procedura për largimin e një gjyqtari në Gjykatën Kushtetuese, kështu që për mua ka qenë vetëm një arsyetim asgjë tjetër. Kjo nuk është temë e re, por është temë që është përdorur disa herë, sa herë iu ka nevojitur partive politike. Për mua mendoj që ka qenë vetëm një lojë politike për ta sulmuar ndoshta Gjykatën Kushtetuese, pasi që ndoshta kanë dëgjuar se cili do të jetë vendimi i saj ende pa u shpallur ai dhe kanë vrapuar që të hedhin vrer”, ka thënë ai në emisionin “Info Nata” në Tëvë1.
