Kryetari i Bashkimit Demokratik për Integrim, Ali Ahmeti, ka shprehur mbështetjen e tij për protestën e thirrur nga Organizatа e Veteranëve të Luftës së UÇK-së (OVL-UÇK), në përkrahje të ish-krerëve të Ushtrisë Çlirimtare të Kosovës.
Përmes një postimi në Facebook, Ahmeti bëri thirrje për pjesëmarrje masive në tubimin që do të mbahet nesër, më 13 dhjetor, në orën 13:00, në Sheshin “Skënderbeu” në Shkup.
Ai theksoi se protesta ka për qëllim kërkesën për drejtësi dhe hedhjen poshtë të akuzave që ai i quajti të fabrikuara nga Serbia dhe Rusia. Ahmeti shtoi se pjesëmarrja është një akt përgjegjësie për nderimin e sakrificës dhe mbrojtjen e së vërtetës historike:
“Nesër, më 13 dhjetor, në orën 13:00, në Sheshin ‘Skënderbeu’ në Shkup, bashkohemi për një qëllim të qartë: kërkesën për drejtësi dhe hedhjen poshtë të akuzave të fabrikuara të Serbisë dhe Rusisë.
Ne dalim me përgjegjësi, për të nderuar sakrificën dhe për të mbrojtur të vërtetën e historisë sonë.
Liria ka emër, UÇK. Dhe ky emër mbetet pjesë e identitetit dhe dinjitetit tonë kombëtar.
Ju ftoj të gjithëve që nesër të jemi bashkë.”
