Gjatë protestës në kryeqytetin shqiptar në mbështetje të ish-udhëheqësve të UÇK-së, Ali Ahmeti nga BDI falënderoi Shqipërinë për mikpritjen dhe solidaritetin e treguar ndaj luftëtarëve të lirisë.
“Faleminderit Shqipëri, nënë! Na ke trajtuar dhe pritur si nëna. Sot ngremë zërin për drejtësi, respekt dhe njohjen e luftës sonë të drejtë”, u shpreh Ahmeti.
Ai theksoi se Gjykata Speciale ka lindur nga pretendime për trafikim organesh që janë konstatuar si trillim, dhe se aktakuza e fundit ndaj ish-udhëheqësve të UÇK-së nuk ka lidhje me këto akuza origjinale, por është riciklim i çështjeve të mëparshme, duke cituar edhe ndikime nga politika ruso-serbe.
Ahmeti gjithashtu falënderoi autoritetet dhe shoqatat shqiptare për kontributin e tyre në organizimin e tubimit dhe u bëri thirrje shqiptarëve nga të gjitha trojet që të jenë të bashkuar në mbrojtje të drejtësisë dhe historisë së luftës së UÇK-së.
Ahmeti dha edhe një mesazh, ku deklaroi se shqiptarët duhet të jenë të bashkuar për kauzën e UÇK.
Ahmeti shtoi se liria e Kosovës nuk është arenë politike dhe ndasi për shqiptarët.
“UÇK ka respektuar të gjitha konventat ndërkombëtare për luftë dhe nuk ka shkelur ligjet e luftës. Është dëshmuar nga gjykata ndërkombëtare dhe vendore. U dëshmua edhe nga dëshmitë amerikane dhe britanike në Hagë. Gjykimi shfaqi botërisht që UÇK ishte partnere e NATO-s amerikës dhe Evropës. Dëshmitë konfirmuan se jemi partnerë të Uashingtonit dhe Brukselit. Liria e tyre është e vonuar duhet të vijë menjëherë, pa asnjë vonesë shtesë. Ka akoma në mesin tonë, ca që i shërbejnë agjentëve ruso-serbe, duke shpërndarë propaganda dashakeqe, pa qenë të vetëdijshëm që i shërbejnë Beogradit dhe Moskës. Liria e Kosovës nuk është arenë politike, nuk është fushë pjellore për ndasi. Duhet të bashkohemi, të bëhemi bashkë, siç u bashkuam për Kosovën Republikë, Shqipërinë në NATO”, deklaroi ai.
